Os feitos ocorreron na zona de Cabo de Cruz. O mariñeiro foi evacuado nunha lancha que navegaba pola zona ata o peirao, desde onde o persoal sanitario o trasladou ao Hospital do Barbanza.
Pasaban as 21:30 horas cando un particular informaba ao 112 Galicia de que estaban a levar a terra a unha persoa, que resultara ferida tras colidir a súa embarcación contra unha das columnas de formigón dunha batea. A persoa sufrira un forte golpe na cabeza, aínda que permanecía consciente.
Desde o 112 informouse para este operativo a Urxencias Sanitarias de Galicia-061, a Salvamento Marítimo, ao Servizo de Gardacostas de Galicia, á Garda Civil e á Policía Local e Protección Civil de Boiro.
Unha vez no peirao, o ferido foi atendido polos servizos sanitarios, e finalmente trasladado en ambulancia ao Hospital do Barbanza.
Pola súa banda, os voluntarios de Protección Civil de Boiro indicaron que a embarcación accidentada, que sufriu importantes danos, foi remolcada por particulares e amarrada no porto de Cabo de Cruz.
