Stop Deshaucios Barbanza advirte da delicada situación dunha familia de Ribeira en risco de ser desaloxada do seu fogar

A plataforma Stop Deshaucios Barbanza vén de advertir de novos casos de familias da nosa comarca en risco de quedar en situación de desamparo social e sen fogar de seu. Un destes casos é o dunha familia humilde de Ribeira, que vén de recibir unha notificación xudicial, por parte do Xulgado Nº1 de Ribeira e a pedimento da entidade financeira de Abanca, onde se sinala a data do lanzamento da vivenda habitual (unha vivenda unifamiliar, situada no centro urbano da cidade), concretamente o 16 de marzo.

A familia atópase baixo a defensa dun avogado de oficio e unha vez contactaron coa Plataforma Stop Deshaucios Barbanza puxéronse en marcha as actuacións pertinentes, ante as partes en conflito. “Trátase”, informa a plataforma, “de que se suspenda o desaloxo e atópense alternativas porque é unha familia vulnerábel, con escasos ingresos económicos e con tres fillos, un deles menor de idade”. A plataforma engade que dende a oficina da Valedora do Pobo están a traballar para poder negociar un alugueiro social e que así a familia poida seguir residindo na vivenda habitual, unha vez que a mesma xa se atopa adxudicada, en poxa pública, á propia entidade financeira. A familia xa se puxo en contacto co departamento dos Servizos Sociais municipais de Ribeira ao obxecto da elaboración do correspondente Informe Social de Vulnerabilidade para poder presentar no Xulgado.

Por outra banda, a plataforma informou de que a familia de pensionistas de Rianxo da que informou as semanas pasadas pola delicada situación na que se atopaba, chegou a un acordo cun fondo de investimento, pendente de materializar coa firma do contrato, para continuar na vivenda habitual a través dun alugueiro social e prol un período de cinco anos.

Tamén, este pasado venres, a plataforma atendeu unha chamada de auxilio dunha nai do Concello de Redondela (Pontevedra) ante o temor do desaloxo, por parte dun dos seus fillos, “ante a mala relación entre ambos”. A plataforma púxose axiña en contacto coa alcaldía e a concelleira dos Servizos Sociais de Redondela e púidose comprobar que a pesar de que o fillo posúe a propiedade da vivenda, en herdanza da súa avoa, esta deixou á filla como usufrutuaria e así poderá seguir residindo na mesma ata os seus últimos días. “Circunstancia que descoñecía a señora, debido a unha grave enfermidade crónica que padece”, explica a plataforma.