Saen adiante en Boiro os proxectos sociais e de mellora viaria propostos polo Concello para os fondos da Deputación

O Concello de Boiro celebrou este xoves o pleno ordinario correspondente ao mes de febreiro. A sesión contou coa ausencia dunha concelleira do Partido Popular polo que asistiron un total de 16 membros da corporación. O pleno saldouse coa aprobación das propostas do Goberno local para os fondos da Deputación.

A sesión, como de costume, puido visualizarse íntegra a través da canle municipal en Youtube.

Votacións da sesión

1. Aprobación, se procede, do ditame da solicitude de participar no Plan provincial de cooperación ás obras e servizos de competencia municipal (Plan Único de Concellos) POS+ 2023 da Deputación da Coruña, así como os proxectos incluídos – aprobado con 14 votos a favor (PP, PSOE, Boiro Novo, IC Boiro e non adscrito) e 2 abstencións (BNG).

2. Aprobación, se procede, do ditame da solicitude de participación no Plan provincial de cooperación ás obras e servizos de competencia municipal (Plan Único de Concellos) POS+ Adicional 1/2023 da Deputación da Coruña para o financiamento de gastos sociais extraordinarios – aprobado por unanimidade (16 votos a favor).

Catro actuacións demandadas pola veciñanza

Finalmente aprobáronse en pleno os proxectos propostos polo Concello ao abeiro do plan de cooperación ás obras e servizos (POS+ 2023) da Deputación da Coruña, que destina a Boiro 615.197,37 euros. Segundo confirmou o Concello, esta contía destinarase a catro importantes obras demandadas pola veciñanza. “Trátase dun investimento moi importante para o noso concello e que imos destinar a obras en diversos puntos do termo municipal, prestando especial atención aos núcleos do rural”, afirmou o alcalde. Trátase das seguintes iniciativas: obras de pavimentación e instalacións de rueiro en Runs e San Mauro (cun orzamento de 429.865,99 euros, inclúen a mellora integral dos rueiros e de Runs e San Mauro, con pavimentado, rede de saneamento de augas pluviais e de abastecemento e substitución de luminarias); beirarrúas na avenida da Constitución entre Salvador Allende e av. de Compostela (cun orzamento de 199.240,61 euros, este proxecto contempla a execución de beirarrúas e dotación de carril bici na avenida da Constitución, no tramo comprendido entre a rúa Salvador Allende e a avenida de Compostela, amais da execución das canalizacións de saneamento, abastecemento de auga e electricidade e a instalación de alumeado, entre outros equipamentos); pavimentación no lugar de Xián (cunha partida de 34.089,21 euros, a finalidade é pavimentar as vías interiores na aldea de Xian coa finalidade de mellorar o conxunto do firme e as súas características funcionais), e reordenación e urbanización do parque en Cimadevila (cun orzamento de 178.365,18 euros, preténdese “renovar e optimizar un espazo de lecer no lugar de Cimadevila, así como aumentar os espazos de estacionamento nun lugar no que escasean”).

A maiores de todo isto, o Concello informou que vai destinar o POS+ Adicional da Deputación ao financiamento de gastos sociais. A contía asignada de 111.152,04 euros permitirá incrementar o gasto social extraordinario e a tramitación urxente de prestacións necesarias en situación de risco para persoas vulnerábeis. Unha parte desta achega provincial encamiñarase ao reforzo-ampliación de persoal técnico ou administrativo adscrito aos Servizos Sociais co “obxectivo de axilizar a atención”. Outras partidas destinaranse a axudas de emerxencia ás persoas soas ou en risco de exclusión. Ademais, reforzaranse os servizos e as axudas económicas para respiro familiar e medidas de conciliación, reservándose outras contías para mellorar os dispositivos de axuda a persoas sen fogar e para as devanditas achegas económicas que axuden ás persoas en risco a sobrelevar os gastos enerxéticos. Amais, adquirirase novo equipamento técnico asistencial (camas, cadeiras de rodas, grúas, etc), entre outras medidas.