Outes dá luz verde a un plan de obras que supera os 600.000 € de investimento

O pleno da corporación munincipal de Outes aprobou nunha sesión extraordinaria celebrada o pasado 9 de febreiro o Plan de Obras de Servizos (POS+2023). O alcalde, Manolo González, agradeceu o apoio de tódalas forzas políticas á proposta do executivo e destacou que foi elaborada con achegas dos distintos grupos da corporación. González destacou que se priorizaron actuacións de mellora en núcleos rurais en tódalas parroquias, así como a mellora de equipamentos no campo de futbol e no pavillón municipal do Cunchido. Tamén se inclúen actuacións nos núcleos urbanos da Serra de Outes, Cruceiro de Roo e O Freixo. Todas estas actuacións ascenden a perto de 620.000 €, reservándose ademas outros 150.000 € para financiar gastos correntes que, segundo explicou González, servirán para atender a suba dos custos enerxéticos municipais.

O alcalde, Manolo González, destacou que as actuacións aprobadas danlle continuadade ao impulso en materia de conservación e mellora de infraestruturas levado a cabo polo actual goberno. “Nestes momentos estanse exectuando ou a piques de comezar importantes actuacións como son a mellora das beirarrúas no porto do Freixo, a senda peonil á piscina municipal ou o saneamento de Quintela a Ousesende. E están a piques de ser adxudicadas actuacións de mellora nos núcleos de Banzas, Outes, Crespos, Entíns ou Tarás, entre outros”. Do mesmo xeito indicou que o executivo traballa nun plan de actuación urxente para paliar os danos das fortes choivas dos meses pasados en diversas estradas e camiños municipais.