O grupo municipal do Partido Popular no Concello de Outes responsabilizou hoxe ao Gobierno Local da perda dunha subvención -43.750 euros- concedida pola Xunta de Galicia para a mellora
do Camiño de Cuns a Salgueiro.
Segundo explicaron os populares, a actuación, compartida co Concello de Negreira, debía executarse e xustificarse antes do 31 de outubro do 2022, unha circunstancia que non se levou a cabo. “Non é a primeira vez que os veciños de Outes quedan sen poder gozar dunha actuación porque o executivo local non é capaz de facela”, denuncian desde o PP, onde aproveitaron para subliñar que o actual Gobierno Municipal perdeu xa un total de cinco subvencións outorgadas por distintas administracións e que suman en total máis de 170.000 euros.
Sobre este asunto, e tras a pregunta realizada no pleno, o alcalde, Manuel Gonzalez López, xustificou o feito de non ter realizada a obra amparándose nas malas condicións climatolóxicas que houbo eses meses. “Unha vez máis, o rexedor ofrécenos argumentos peregrinos que non hai por onde collelos. A realidade é que a súa falta de xestión a están a pagar os veciños de Outes que quedan sen servizos que merecen e que lles corresponden”, apunta desde o Partido Popular.
430.000 euros en facturas sen pagar
Por outra banda, o grupo municipal popular aproveitou o pleno deste mes para incidir en que a súa formación segue sen ter no seu poder a listaxe de facturas que o goberno local deixou sen pagar no ano 2022. “O único que puidemos saber é que o número de facturas sen pagar no 2022 ascende a 1.495 por un valor de 430.000 euros”, explicaron os populares, quen engadiron que este feito obrigará a que o Goberno local aprobe un reconcomiento extraordinario de crédito para poder facer fronte a este montante e que, segundo indicaron, “hipotecará o orzamento prorrogado do 2023”.
Neste sentido, e cansos das escusas do señor González López aludindo a que este problema ten que ver coa carga de traballo dos empregados do concello, os populares incidiron en que “o único certo é que antes, en Outes, pagábanse as facturas e, agora, o goberno actual non é capaz de facelo pola súa falta de xestión e de responsabilidade”.
