A Escola Infantil de Vite (Santiago) acolleu este martes unha das actividades organizadas pola Xunta para conmemorar o Día Internacional da Lingua Materna, que se celebra, precisamente, este 21 de febreiro. A cita en Compostela consistiu nun concerto no que o alumnado puido gozar da música de Magín Blanco e María Faltri. Ademais, co gallo desta efeméride, a Secretaría Xeral de Política Lingüística puxo a disposición da sociedade novos recursos dixitais elaborados para dinamizar o uso do galego. Así o deu a coñecer o secretario xeral Valentín García, que participou na celebración da Escola de Vite.
García fixo fincapé na importancia deste tipo de iniciativas “para que a cativada se relacione coa súa contorna e no seu día a día usando a lingua galega”. E engadiu: “O obxectivo é fomentar o uso do galego tanto nos máis pequenos como na sociedade en xeral para que a nosa lingua estea presente en todos os ámbitos”.
Segundo explicou, ademais da actividade musical celebrada en Santiago, Política Lingüística novos recursos dixitais elaborados no marco da convocatoria TeCeRedes. Así, no Portal da Lingua están xa dispoñibles o xogo interactivo Ti es a chave da primavera, de Ronsel de Ideas, e os audiovisuais Ñam, Criando lingua e Calcetís e paxarín. Neste mesmo espazo tamén pode verse o vídeo elaborado con motivo desta efeméride pola Rede para Promover a Diversidade Lingüística, da que forma parte a Xunta de Galicia xunto a outros gobernos, entidades e universidades europeas.
A efeméride
O Día Internacional da Lingua Materna foi proclamado pola Conferencia Xeral da UNESCO en novembro de 1999 e celébrase anualmente dende o 21 de febreiro de 2002 cos obxectivos de “promover o plurilingüismo e a diversidade cultural”. Nesta edición o tema arredor do que xira a conmemoración é Educación Multilingüe, a necesidade para transformar a educación.
