O Entroido prosegue este martes cunha axenda de actividades moi destacada. A festa concentrarase novamente na contorna da praza de Galicia, onde darán comezo (arredor das 18.00 horas) o desfile e o concurso que fará un percorrido polas rúas de Boiro (saída da Praza de Galicia, rúa Peonil, Salvador Allende e rúa Principal para volver á Praza de Galicia) e festa de entroido con DJ Matrek.
Ao día seguinte, tamén encadrada na programación de actividades municipais do Entroido, celebrarase a presentación do caderno cultural O Felipiño de Escarabote (número 14 dos cadernos), a partir das 20.00 no Centro Social da dita vila boirense. A publicación é un achegamento á memoria do Entroido local e do Felipiño, unha festa con máis de 80 anos de historia en Escarabote.
