O Concello de Boiro vén de solicitar á Consellería de Medio Ambiente da Xunta de Galicia a inclusión das charcas de Abanqueiro e Carragueiros no catálogo de zonas húmidas de Galicia. A catalogación destes espazos “vai permitir aumentar as posibilidades de xestión e conservación dos mesmos”, sinalou o Concello boirense.
O obxectivo desta solicitude é “mellorar, conservar e xestionar as zonas húmidas do noso termo municipal como son as de Abanqueiro e Carragueiros, que posúen un alto valor ecolóxico”, explican fontes do Consistorio, engadindo que “solicitamos no 2021 financiamento para tal fin, xa que a charca de Abanqueiro comezou a dar problemas aos veciños, queremos recuperala e poñela en valor”, recoñeceu o concelleiro de Medio Ambiente, Raúl Treus.
Este rexistro das zonas húmidas de Galicia é de carácter público e contén información sobre o número, extensión, valores e estado de conservación dos espazos existentes na comunidade para a súa xestión. “Con esta solicitude o que se busca é aumentar as posibilidades de lograr financiamento que permita a mellora e conservación destes espazos naturais de gran importancia e interese paisaxístico”, afirmou o concelleiro.
