O Concello de Boiro está mergullado no proceso para estabilizar a temporalidade laboral de 111 traballadores e traballadoras municipais. O alcalde, José Ramón Romero, a concelleira de Persoal, María Outeiral, e o presidente do Comité de Empresa, Cesar Tarela, explicaron polo miúdo o proceso este mércores 8 de febreiro en rolda de prensa. “Cando entramos no Goberno en 2019 atopámonos cunha alta porcentaxe de emprego temporal, que rolda o 90%, polo que a nosa prioridade en materia de persoal foi reducir esa cifra e lograr melloras en canto ao emprego”, afirmou o alcalde, engadindo que o traballo conxunto destes anos entre o Executivo de Boiro, o Comité de Empresa e o departamento de persoal “fixo que neste momento estean en proceso 53 procesos selectivos para a estabilización de 111 prazas”.
Pola súa banda, María Outeiral explicou que “o borrador de RPT coa que contaba o Concello de Boiro non se axustaba ás necesidades reais do traballo polo que, de man do Comité de Empresa, decidimos traballar paralelamente cunha prioridade na estabilización para a redución da temporalidade”. A edil engadiu que “neste momento están pendentes de ser publicadas as listas de persoas admitidas nos distintos procesos selectivos para a realización das probas e rematar o proceso da estabilización”.
Pola súa parte, César Tarela informou da que xa se realizaron ata catro asembleas xerais e dúas mesas xerais de negociación para “lograr un acordo nas liñas de traballo a seguir e convocar o proceso de estabilización”. En concreto, negociáronse as bases xerais e específicas de 53 procesos selectivos e creouse por parte do comité unha oficina de asistencia para axudar a todo o persoal a presentar a documentación e que ninguén quedase fora do proceso.
“Estamos moi satisfeitos co traballo realizado e co esforzo que se realizou, tanto por parte do comité como por parte do departamento de persoal para sacar adiante estes procesos selectivos para a estabilización de emprego e seguiremos traballando da man para elaborar agora unha RPT que responda ás necesidades actuais do Concello”, afirmou o rexedor.
