O Concello de Boiro aumentou o cadro de persoal da Policía Local coa incorporación de dous novos axentes que contan coa praza en propiedade correspondente á Oferta de Emprego Público. Os novos axentes tomaron posesión na mañá deste martes 14 de febreiro acompañados do alcalde, José Ramón Romero, e o xefe da Policía Local.
As persoas acabadas de incorporar ao corpo superaron as probas do proceso selectivo realizado polo Departamento de Persoal do Concello de Boiro para a provisión en propiedade das prazas correspondentes á OPE 2019 e superaron tamén o período de formación na Academia Galega de Seguridade para incorporarse dende este 14 de febreiro ao corpo da Policía Local de Boiro.
O alcalde, José Ramón Romero, deulles a benvida e desexoulles o mellor “nesta profesión que iniciades e que terá momentos difíciles pero, se traballades con profesionalidade, será moi gratificante. Estou seguro de que ides realizar un gran traballo”.
