O Concello de Boiro, a través da Concellaría de Cultura, vai desenvolver na segunda metade de febreiro unha programación cultural específica para o Entroido que contempla o tradicional concurso de disfraces e carrozas. As bases da convocatoria e o formulario de inscrición están xa dispoñíbeis a disposición das persoas interesadas na web municipal, boiro.gal.
O certame de disfraces e carrozas celebrarase o martes 21 de febreiro na praza de Galicia. “O martes de Entroido volve ser este ano festivo local polo que apostamos unha vez máis por celebrar este día o tradicional concurso de disfraces e carrozas”, afirmou a concelleira de Cultura, María Outeiral.
As inscricións están abertas a todas as asociacións, comunidades, grupos culturais, veciñais ou de persoas que o desexen, e deberán facelo antes das 17.30 horas do propio día do desfile. Existen tres modalidades para o concurso: individual/parella para maiores de 13 anos, grupos formados por tres ou mais persoas e carrozas. Os premios serán de 300, 200, 150 e 100 euros para os catro primeiros clasificados na categoría individual; de 600, 300, 250 e 200 euros para os catro primeiros na categoría de grupos; e de 1200, 800 e 500 euros para as tres primeiras carrozas.
O xurado valorará a estética, orixinalidade e creatividade dos disfraces; a posta en escena con coreografías, os instrumentos, etc.; os detalles do disfrace tales como o vestiario, a maquillaxe, as máscaras ou outros complementos; a elaboración propia/artesanal…
“Trátase dunha actividade onde o máis importante é ser creativo, pasalo ben e vivir o espírito do Entroido”, engadiu a concelleira.
As inscricións son gratuítas e poden facerse xa de xeito presencial ou po teléfono no Centro Social de Escarabote, de luns a venres en horario de 10.00 a 13.00 horas; ou no mesmo día do concurso antes das 17.30 horas.
Como dixemos, as bases do concurso e os formularios de inscrición están a disposición das persoas interesadas na web municipal (www.boiro.gal).
