Este luns 27 de febreiro, trala entrega dos almorzos solidarios ao comedor social (o local solidario de ICE Renovación na rúa de Cervantes), o alumnado do Obradoiro de Emprego Tahume VIII na especialidade de cociña acudiu ata o Malecón para para visitar o foodtruck que dende este domingo está alí emprazado no marco da campaña Galicia sabe aMar pertencente, á Consellería do Mar.
Alí, o alumnado degustou uns petiscos e puido coñecer paso a paso os ingredientes dos mesmos, o que redundou na súa formación.
A campaña Galicia sabe aMar é unha iniciativa itinerante posta en marcha pola Consellería do Mar para incidir “na importancia de consumir peixes e mariscos” e máis “na gran variedade de produtos da máxima calidade que o complexo mar-industria de Galicia pon a disposición da cidadanía”.
