A xunta de Goberno local do Concello de Ribeira aprobou na súa reunión deste 2 e febreiro o convenio de colaboración para que unha protectora de animais xestione o centro de recollida de cans e gatos de Ribeira.
Concretamente, logo do proceso público realizado conforme as bases aprobadas en maio do ano pasado, a protectora designada é a asociación Save an Angel – Los Olvidados de la Perrera de Ribeira – Adopta.
O convenio ten por obxecto a prestación dos seguintes servizos:
1. Recollida de animais de compañía abandonados, errantes, feridos ou enfermos nas vías e espazos públicos, en toda a extensión do territorio de Ribeira, e traslado a centro de acollida. Conforme ás cláusulas do acordo, o servizo de recollida de animais prestarase de forma continuada todos os días do ano en horario diúrno (de 08.00 a 22.00 h.), mesmo festivos. En horario nocturno (de 22.00 a 08.00 h.) atenderanse os servizos de máxima prioridade.
2. Identificación, saneamento e mantemento dos animais de compañía recollidos.
3. Xestión do centro de recollida e aloxamento.
4. Servizo de visitas e adopción de cans e gatos. A atención para reclamacións, trámites de adopción de animais e recepción de animais de particulares por imposibilidade de facerse cargo do seu coidado será realizado pola entidade seleccionada, como mínimo, de luns a venres en horario partido de mañá e tarde (mínimo de 4 horas/día), e sábados en horario de mañá (mínimo de 2 horas).
5. Eutanasia humanitaria e xestión de cadáveres. De conformidade co previsto no artigo 15.4 da Lei 4/2017, de 3 de outubro, non se poderá dar morte aos animais acollidos nun centro de recollida ou fogar de acollida temporal, con independencia do tempo transcorrido desde a súa entrada. Non obstante, exceptúase da prohibición establecida no punto anterior os supostos de eutanasia do animal debidamente motivados por escrito polo servizo veterinario, co fin de evitar un sufrimento grave e irremediábel ou unha afección grave, ou ben por razóns motivadas de sanidade ou benestar animal, de saúde pública, de seguridade das persoas, ou ambientais.
6. Medidas para a tenza responsábel e o control de abandonos.
7. Campañas de control e captura de colonias de cans e gatos.
8. Páxina web e redes sociais.
O prazo de vixencia deste convenio unha vez sexa asinado será de tres anos, podéndose prorrogar polo período máximo dun ano máis.
