A cultura segue viva en Noia durante os meses de febreiro e marzo, logo do completo menú cultural achegado polo Concello, dende a Área de Cultura que dirixe José Perez, durante a celebración do Nadal. Precisamente o departamento vén de compartir nas redes sociais a axenda para esta segunda metade do inverno. Haberá literatura, cinema, teatro e música, entre outras propostas dunha axenda que foi concibida, novamente, “para todos os públicos”.
A programación comezou esta finde: este sábado 4 coa proxección de Encanto, proseguindo este venres 10 coa presentación de O espello de dúas caras (Toxosoutos), do escritor e médico José Manuel Cairo Antelo. Será na Casa da Cultura, con entrada de balde, a partir das 20.30 horas.
A axenda prosegue ao día seguinte, cunha nova actividade do ciclo Noia En-Cántame, que incluirá concertos de Cantaparanoia, As Lens e Esperanza Mara. Será no Coliseo Noelo o domingo 12 ás 18.30 horas. A entrada será de balde até completar aforo.
Febreiro rematará coa actividade Eu Leo a Rosalía (23 de febreiro) e cunha nova xeira musical de Noia En-Cántame (o domingo 26 a partir das 18.30 horas, no Coliseo Noela), con Misela, Atlántico e o Coro Habanoia.
Marzo cultural abrirá o día 3 coa presentación do libro Xogos tradicionais populares galegos para tempos de recollida, actividade á que se suma a revisitación de O Porco de Pé, de Vicente Risco, elaborada por Producións Teatrais Excéntricas. Será o sábado 4 ás 20.30 horas. As entradas pódense adquirir a partir do 15 de febreiro en ataquilla.com ou no mesmo día da función a partir das 19.30 horas no portelo do Coliseo Noela.
As artes escénicas regresan días máis tarde, o sábado 11, con Papagena de ButacaZero. Será a partir das 20.30 horas no Coliseo. As entradas, de balde até completar aforo.
O domingo 12 volve o teatro coa representación de Comisaría Especial para Mulleres, de Lúa Chea Teatro. Será a partir das 18.30 horas no Coliseo Noela.
Marzo rematará con outra peza escénica: Continente María, de Ainé Producións. Será o día 25 ás 20.30 horas no Coliseo Noela. As entradas poden obterse en ataquilla.com a partir do día 15 de febreiro ou o mesmo día da función no portelo do Coliseo.
