Este domingo celébrase no local mutiusos do Mercado Municipal de Boiro un obradoiro de iniciación ao baile tradicional en familia. Será a partir das 12.00 horas. Trátase da última clase dun programa formativo de iniciación ao baile galego, para nenos e maiores, que realiza a Asociación Xilbarbeira poñendo o foco nas crianzas de máis de 3 anos.
Xilbarbeira, a mais dunha asociación, é unha escola-agrupación de Boiro fundada no 1995, con sede de operacións no Centro Social da localidade. A entidade, que se centra sobre todo na danza e pandeireta tradicional galega, é un colectivo interxeracional no que ten cabida toda aquela persoa con interese pola tradición folclórica da nosa terra.
