O Concello de Dodro celebra este ano o Entroido con dúas grandes actividades creativas, participativas, abertas, inclusivas e festivas. A primeira, chamada Entroido cultural consistirá nunha proposta lúdico pedagóxica dirixida á infancia de entre 6 e 12 anos, que se desenvolverá o luns e o martes de Carnaval, 21 e 22 de febreiro, entre ás 10.30 e as 13.00 horas, na Casa da Cultura. Lugar onde, os días 12 e 13 de febreiro, as familias deberán inscribir ás/ós menores que desexen participar nesta iniciativa.
A segunda actividade será Entroido choqueiro, programada para o martes 22 de febreiro pola tarde, ás 17.00 horas, no Souto da aldea de Reboiras. Esta proposta de lecer do Concello trasladarase ao Pavillón Municipal de Deportes no caso de choiva. Trátase, segundo informou a área de Cultura do Concello de Dodro, “dunha actividade para o desfrute do conxunto da poboación que incluirá un espectáculo de animación musical, premios aos mellores disfraces, sorteo dunha cesta de produtos de Carnaval entre o público asistente e degustación popular das orellas, doces, típicas destas datas”.
O Concello de Dodro convida a toda a veciñanza a participar e conservar esta celebración tradicional.
