Unha patrulla do destacamento de Tráfico deu o alto o pasado luns 6 de febreiro a un vehículo cuxo condutor estaba a facer uso do teléfono móbil mentres conducía no punto quilométrico 1,200 da AG-46, no termo municipal de Moaña (Pontevedra).
Unha vez detido o vehículo para notificar a infracción, e tras identificar o condutor, que resultou ser un veciño de Boiro de 42 anos, os axentes procederon á inspección do vehículo, momento no que comprobaron que portaba no maleteiro dous capachos de ourizo de mar cuns 70 quilogramos sen acreditar a súa procedencia ao non portar ningún tipo de documentación.
Unha patrulla do Seprona de Cangas fíxose cargo do produto, devolvéndoo ao mar, e procedeu a levantar unha acta de denuncia debido á falta de guía de transporte así como por non realizalo nun vehículo adecuado. Ademais, o condutor foi denunciado por conducir utilizando manualmente o seu móbil.
