O Concello de Dodro informou do inicio (os días pasados) das obras destinadas a mellorar a seguridade viaria en Eiró. Os traballos centraranse nun treito de 375 metros e 4 metros de ancho medio, así como 100 metros cadrados de sobreanchos e abanicos. O obxectivo é poñer a punto o firme da vía coa dotación dunha nova capa de rodaxe de 6 cm de mestura bituminosa, previa reparación de fochancas e perfilado de mordentes con grava e tratamento asfáltico semiprofundo.
Prevese a execución de 370 m. de senda peonil de 1,80 m. de ancho, cun firme de 15 cm de saburra artificial e 15 cm de formigón en formación de pavimento, previas demolicións precisas de entradas e a apertura de sobreanchos.
Baixo esta senda colocaranse 370 m. de tubo de Ø400 mm. para canalización de augas pluviais, con execución de 8 pozos de rexistro e a colocación de 12 arquetas con sumidoiro para a recollida das augas. Ademais prevese a canalización de 135 m. para alumeado público, con 3 arquetas asociadas.
Ascende o Presuposto Base de Licitación (IVE incluído) á cantidade de 72.135,03 €.
