O Concello de Boiro inaugurou esta mañá unha exposición fixa ao aire libre que recolle a memoria histórica do municipio e está instalada na praza de Cimadevila, a carón do Cuartel Vello. A mostra estará composta por catro paneis que recollen a información das 22 persoas represaliadas que ata a actualidade foron homenaxeadas no monumento dos mártires situado na rotonda de Cimadevila. Os textos están escritos por Xosé Deira e conteñen fotografías recollidas polo historiador Antón R. Gallardo.
O obxectivo desta exposición é recuperar a memoria histórica, patrimonial, cultural e social de Boiro. O Camiño Real foi unha das primeiras vías de comunicación do municipio e que recolle moitos elementos patrimoniais e de memoria colectiva, especialmente na zona de Cimadevila. “Con esta mostra o que pretendemos é facer unha institucionalización das políticas de memoria histórica e ser unha homenaxe a todas aquelas persoas que foron represaliadas nun momento moi negro do noso país e do noso concello”, afirmou a concelleira Dores Torrado.
O presidente da Comisión pola Recuperación da Memoria Histórica do Barbanza, Carlos Cimadevila, agradeceron o traballo realizado polo Concello e “que a mostra se siga ampliando cos nomes das demais persoas que foron represaliadas en Boiro” xa que “o pobo que olvida a súa historia está condenado a repetila”.
O autor dos textos, Xosé Deira, quixo destacar das 22 persoas homenaxeadas a súa faceta máis humana por eles e polas súas familias. “É importante que a memoria volva aos sitios aos que se debe, como é esta
praza. Este acto non é so unha homenaxe aos represaliados, senón a todo o pobo de Boiro”, recoñeceu Deira.
No acto inaugural estivo tamémn o deputado provincial, alcalde e Ames e veciño de Boiro, Blas García, que é familiar dunha das persoas homenaxeadas. “Para min é unha satisfacción moi grande vir a Boiro e facelo para asistir a un acto como este. Hai moitas familias que seguen sen saber onde están enterrados os seus familiares e temos que dignificalos e lembrar a nosa historia”, afirmou.
Pechou o acto o alcalde, José Ramón Romero, que recoñeceu o gran traballo que se leva a facer nos últimos anos para recoller a memoria de Boiro e indicou que “imos seguir traballando para que todas estas persoas, que loitaron por Boiro, sexan recordadas”. “Temos que dar a coñecer e visibilizar esta parte da nosa historia para que non se volva repetir”, recoñeceu o alcalde.
