Este mércores 15 de febreiro, ás 12.00 horas, o CIFP de Coroso (Ribeira) acollerá un encontro coa escritora galega Fina Casalderrey, sen dúbida unha das grandes representantes das letras galegas das últimas décadas, cunha dilatada carreira profesional e literaria e cunha carreira adicada aos libros (especialmente infantís e xuvenís) que complementou coa autoría de guións audiovisuais e como integrante da Real Academia Galega (RAG).
O encontro literario con Fina Casalderrey foi posíbel grazas ao financiamento do Ministerio de Cultura, contando coa organización do Equipo de Dinamización de Lingua Galega, o Equipo de Dinamización da Biblioteca e o Departamento de Orientación do CIFP de Coroso. A escritora manterá un faladoiro co alumnado de FPB, cita que estará aberta á participación de 60 alumnas e alumnos, que poderán coñecer de primeira man a obra da autora ao longo dunha hora e media.
A autora
Xosefa Casalderrey Fraga, máis coñecida como Fina Casalderrey, nada en Xeve (Pontevedra) o 11 de agosto de 1951, é unha escritora, profesora de educación secundaria, etnógrafa vocacional, gastrónoma, conferenciante e periodista galega. Ademais, é unha das escritoras máis importantes da historia da literatura infantoxuvenil galega. Mestra, diplomada en Lingua e Literatura e membro da Real Academia Galega, a súa é unha traxectoria fértil coma poucas e chea de recoñecementos.
Autora de máis de medio cento de títulos, algúns dos libros que publicou ao longo destes últimos cinco lustros convertéronse en obras referenciais que se reeditan e extractan unha e outra vez. É o caso de Dúas bágoas por máquina (1992) ―Premio Merlín―, O misterio dos fillos de Lúa (1995) ―Premio O Barco de Vapor e Premio Nacional de Literatura Infantil e Xuvenil―, O estanque dos parrulos pobres (1996) ―Premio Edebé de Literatura Infantil― ou A lagoa das nenas mudas (2007) ―Premio Frei Martín Sarmiento―, entre moitas outras.
Traducida a máis dunha ducia de idiomas, incluído o braille, ten desenvolvido tamén un destacado labor no eido do fomento da lectura e a renovación pedagóxica do ensino, amais de promover o teatro escolar e a investigación etnográfica no ámbito educativo.
