Medio millón de euros é a cantidade que anunciaba o departamento de Cultura da Deputación da Coruña que será encamiñada a financiar as actividades de fundacións e entidades privadas sen ánimo de lucro titulares de museos, centros de interpretación ou bibliotecas.
Estamos a falar de axudas que permitirán que cada entidade beneficiaria opte a un importe que irá dos 1.500 euros até os 30.000 euros. O prazo de presentación de solicitudes remata o 10 de marzo.
O obxectivo deste programa será o de promover a accesibilidade social, física e intelectual aos contidos culturais dos museos, centros de interpretación, bibliotecas e fundacións; apoiar a diversidade cultural e lingüística; impulsar a inclusión da perspectiva de xénero nas liñas de actuación; fomentar os proxectos de creación contemporánea arredor do patrimonio cultural custodiado; ou favorecer actuacións de sensibilización arredor do valor do patrimonio cultural e a función social.
Engadir que tanto as solicitudes como o resto da tramitación desta convocatoria realizarase por vía telemática a través da plataforma SUBTEL, accesíbel dende a sede electrónica da Deputación.
As bases da convocatoria están publicadas no Boletín Oficial da Provincia do 3 de febreiro e pódense consultar e descargar na seguinte ligazón.
