O PSdeG realiza un acto político este venres día 10 ás 19.30 horas, no Teatro Elma da Pobra do Caramiñal, que tratará de reunir a xente de todo o Barbanza, no que se proxectará o documental Prestige, 20 anos despois, realizado polo equipo de comunicación de PSdeG como “un exercicio de partido e do que
Patricia Lojo reivindica a súa importancia para “non esquecer” a xestión do PP daquela catástrofe.
O acto contará coa secretaria xeral da agrupación socialista local e concelleira de cultura, Patricia Lojo, que reivindicou a importancia de “facer memoria colectiva cun evento moi importante para todo o país” e para a súa comarca en especial, así como que as novas xeracións coñezan o que pasou. Do mesmo xeito, resaltou que buscan que non se esqueza a xestión dos populares naquela catástrofe, para que non se volva a repetir.
Tamén contará co coordinador comarcal, Luis Ruiz, e en representación da dirección galega do PSdeG, Alberto Varela, alcalde de Vilagarcía, presidente da FEGAMP e secretario de política municipal da executiva nacional dos socialistas.
No teatro Elma proxectarase tamén o documental realizado polo equipo de comunicación dos socialistas, que conta o sucedido dende a visión dos protagonistas, repasando o inicio da catástrofe, a xestión política, a mobilización cidadá e o poso que deixou na sociedade galega esta experiencia.
O documental, que busca facer “cultura de partido”, conta coa participación de figuras destacadas dos socialistas galegos naquela época, como o expresidente Emilio Pérez Touriño ou a exconselleira de Pesca, Carmen Gallego, así como o actual secretario xeral, Valentín González Formoso.
Trala proxección haberá un coloquio que contará con algún dos protagonistas, destacando entre eles a Manuel Maneiro, patrón maior da cofradía da Pobra no 2002, Loli Gómez, bateeira de Rianxo e presidenta de Mulleres Salgadas e Josefa Caneda, mariscadora histórica de Aguiño, así como o militante socialista máis antigo da Pobra, José Francisco Millán, que “saíu a coller chapapote coas súas mans” cando comezou a catástrofe.
Anunciaron tamén que a entrada será de balde e haberá uns petiscos ao finalizar o acto concibido polos socialistas da Pobra como un exercicio para recordar a importancia da unión do pobo e das consecuencias que pode ter a xestión do PP.
