Co peche do ano o pasado 31 de decembro de 2022 dábase carpetazo a un expedente que, por moito que uns e outros nos empeñáramos en facelo bo, a realidade é que non existe motivo algún que convide a dicir que foi un bo ano.
Nen para os traballadores do sector pesqueiro, nen para os armadores e institucións ou entidades vencelladas ao mar foi o de 2022 o mellor ano da vida de calquera das persoas que teñen que ver co sector marítimo-pesqueiro en Galicia.
Comezou prácticamente o ano que vimos de despedir co accidente pesqueiro máis tráxico das últimas catro décadas: o afundimento en augas de Terranova do pesqueiro de Marín Villa de Pitanxo, con 24 homes a bordo dos que só poideron ser rescatados con vida 3. O caso aínda está por resolver e hai declaracións contradictorias ao respecto.
Catro meses máis tarde, o Albacora Cuatro, con base en Vigo, proporcionaba outra loitosa nova: 2 tripulantes mortos e 8 feridos, ao se rexistrar a bordo un estourido cuxas causas tamén se estudan. Ocurriu en augas da Seychelles.
Son dous dos máis significados incidentes rexistrados no mar no mar o ano pasado en buques que teñen relación directa con Galicia.
Mais outros feitos marcan asimesmo a esta Comunidade Autónoma no que atinxe á pesca: 73 barcos cuxa actividade depende de xeito case que exclusivo da captura de xurelos, entran nunha crítica situación debido á forte redución da cota española desta especie. Unha situación que non por agardada resulta menos dura para o sector porque, amáis dos barcos, afecta tamén ás lonxas e a quen reside nas localidades nas que estas radican.
Para a Galicia mariñeira, 2023 vai ser un ano sumamente difícil debido á decisión comunitaria de non permitir calar aparellos no amplísimo espazo atlántico que existe entre España e Noruega, onde o cerco asina -sen querela- a acta de defunción dun segmento de frota que só en augas do Cantábrico supón reducir a súa capacidade de pesca de 17.400 toneladas a 3.271.
A crise do xurelo é máis seria do que parece, porque nen sequera a suba de prezos medios e a maior abundancia de sardiña e xarda compensan a imposibilidade dos cerqueiros de compensar a perda que significa non vender xurelo, produto pesqueiro sumamente prezado de captura estacional pero ampla.
Durante o ano 2022 vendéronse 15.800 toneladas, a cifra máis baixa do último decenio. Son vendas que, grazas aos prezos medios e a alza da sardiña citados, acadáronse pèrto dos 49 millóns de euros. As posibilidades de capturas de xurelo en 2023 redúcense na práctica máis dun 23%. Mais semella que o dato non ten importancia para unha Unión Europea que só contempla o mar como vehículo para o transporte doutras mercadorías.
