Portos de Galicia, en solicitude do Concello de Ribeira, sacou finalmente a concesión dunha parcela en Aguiño para a construción do Centro Municipal de Deportes Náuticos e a sede do Club de Remo. A información da concesión ao Concello do dito predio en Aguiño foi feita pública este 19 de xaneiro. Así sae referido no Diario Oficial de Galicia, onde se anuncia (segundo un acordo tomado o pasado 28 de novembro) a apertura dun período de 20 días hábiles para que as persoas interesadas poidan examinar o expediente e presentar aquelas alegacións que consideren oportunas.
Concretamente, a superficie demandada polo Concello comprende un total 1.117 metros cadrados para unha parcela que ten unha superficie total de 2.235 metros (achégase plano adxunto). O terreo atópase urbanizado, sen desnivel destacábel, con todos os servizos de saneamento e abastecemento ao pé da mesma, e “o centro non tería un impacto visual relevante”, especificou o Concello, engadindo que “de acordo co proxecto elaborado pola empresa Oxil Arquitectura, o centro tería unha superficie útil de 1.065 metros cadrados, repartidos en dous andares, deixando o resto de espazo para permitir manobras, prazas de aparcamento e futuros crecementos”.
O andar baixo contará cun espazo para o almacenamento de embarcacións, así como á entrada ao club de remo, localizándose no mesmo o hall, o foso de remo e a recepción. No andar primeiro disporase un salón multiusos, despacho, baño adaptado, ascensor, vestiarios, ximnasio, zona fitness e cardio. A obra ten un orzamento de 1.210.000 euros, IVE incluído.
Como valor engadido, salientar que dentro das obras de remodelación da fronte de Aguiño que se están a realizar no marco da EDUSI Máis Ribeira Atlántica, vanse situar nas proximidades novas instalacións públicas de pump track e calistenia, que poderían servir de apoio complementario ao centro.
O Concello de Ribeira lembrou tamén que o Executivo local e Club de Remo estableceron de consenso esta localización en maio do ano pasado, logo de que non prosperasen outras alternativas e “inmediatamente dende o Goberno de Ribeira comezamos as xestións e reunións para poder ocupar unha superficie sobre a que xa tiña solicitado con anterioridade unha declaración de interese”, engadiron dende o Consistorio.
