O servizo de Protección Civil e Emerxencias do Concello de Boiro atendeu durante os últimos días máis de medio centro de incidencias producidas polo temporal. Segundo fontes do Consistorio, os fortes ventos e choivas produciron caídas de árbores, asolagamentos e tamén cortes de luz por caídas do tendido eléctrico.
No balance de dispositivos e danos faise saber tamén que “o temporal producido durante a fin de semana fixo que se rexistrasen numerosas incidencias en diversos puntos do municipio”. Así, o servizo municipal tivo que asistir en varias ocasións para “desobstruír estradas pola caída de árbores”, así como “atender desprendementos de tellas ou outros elementos que podían supoñer un perigo para os viandantes e a circulación”.
O alcalde José Ramón Romero engade que “a rápida resposta dos servizos de emerxencia fixo que non se producisen maiores complicacións nin que tivésemos que lamentar grandes danos”.
O servizo municipal de Protección Civil e Emerxencias do Concello de Boiro presta servizo as 24h do día para atender urxencias e outras emerxencias, así como a coordinación da seguridade en probas ou eventos.
