Outes solicita o arranxo inmediato da AC-550 ao seu paso polo concello

O Concello de Outes vén de solicitarlle á Xunta de Galicia que realice unha actuación urxente na AC-550, no tramo que conecta a ponte nova de Seilán e a localidade do Freixo, e que transcorre pola Serra de Outes e polo Cruceiro de Roo. Segundo indicou o alcalde, Manolo González, xa en 2020 se abordou a necesidade de mellorar o firme desta estrada, tanto en reunións mantidas co director xeral de infraestrutruas Francisco Menéndez como coa conselleira, Ethel Vázquez, sen que se realizara ningunha actuación de mantemento até o momento. Dende o goberno municipal indican que se está a producir unha total deixadez co coidado da que é a principal vía de comunicación que estrutura o concello e pola que circulan centos de vehículos diariamente. González apuntou que a consellería amosa unha absoluta falta de empatía coa veciñanza de Outes, e recordou que tamén está pendente rematar o arranxo da AC-196 “que se fixo só parcialmente”. Finalmente lembrou que o proxecto de mellora e humanización da avenida de Fisterra, na Serra de Outes, segue en stand by e nada se sabe del dende que a primeiros de 2020 saíra á información pública.