M.A.- Nova oportunidade de estrear a marcadora de puntos para o O Rotogal Boiro Voleibol. Os de Emilio Palacio reciben este sábado 21 de xaneiro ao Barça Voleibol (ás 19.00 horas na Cachada), o sexto clasificado da Superliga. Os pasos para blindar o pavillón boirense e dar unha alegría á afección pasan por incrementar a contundencia ofensiva e ofrecer a mellor versión do curso.
O Rotogal Boiro Voleibol mantén a dúbida de Martín Casais, que se atopa na recta final da recuperación dunha lesión no xeonllo. Os da Cachada, que están a brillar esta tempada en aspectos do xogo como a recepción, iniciaron a conta atrás no camiño cara á permanencia na Superliga.
Tras un bo inicio de tempada, o Barça Voleibol asentouse na zona cómoda da clasificación. O equipo azulgrana sumou dúas vitorias como visitante no que vai de curso; foi contra dous rivais directos do Rotogal Boiro Voleibol na loita por eludir o descenso: Palma (1-3) e Téxtil Santanderina (0-3). A pasada fin de semana, asinaron unha meritoria remontada contra o Arenal Emevé (3-2) despois de ceder os dous primeiros sets. O central Alexander Carabali e o receptor Yohan León foron incluídos no septeto ideal da xornada.
Precedentes
Tempada 2022-2023
Barça Voleibol, 3-Rotogal Boiro Voleibol, 0.
Tempada 2020-2021
Barça Voleibol, 1-Rotogal Boiro Voleibol, 3.
Rotogal Boiro Voleibol, 0-Barça Voleibol, 3.
