Miguel Álvarez.- Tras o parón do Nadal, o Rotogal Boiro Voleibol regresa á acción na Superliga co derbi galego contra o Arenal Emevé. Ambos os conxuntos mediranse pasadomañá ás sete da tarde na Cachada nun duelo ao que chegan en situacións clasificacións moi diferentes. Os boirenses iniciaron a conta atrás na carreira pola permanencia e perseguen sumar os primeiros puntos do curso diante da súa afección. Os lucenses, pola contra, selaron o mes pasado a clasificación para a Copa e navegan pola zona cálida da táboa.
O Rotogal Boiro Voleibol contará para o derbi de pasadomañá coa baixa de Martín Casais, que
xa se reintegrou nos adestramentos, pero aínda non pode competir. Si poderá participar Gaby do Carmen, a pesar de que aínda arrastra molestias no nocello.
Emilio Palacio, adestrador do Rotogal Boiro Voleibol, manifesta que “o saque vai ser bastante importante neste partido. E, se conseguimos ser máis contundentes en ataque, poderemos ter máis posibilidades. Os derbis motivan máis e necesitamos puntos, vai ser un partido especial”.
El Arenal Emevé, oitavo con 18 puntos, asentouse na zona tranquila da clasificación. Os lucenses, liderados por Víctor Bouza, contan coa achega do central Romaní e dos opostos Vitor Alves e José Luis Linares como valores máis importantes.
