M.A.- Complicada saída para o Rotogal Boiro Voleibol, que visita este sábado 28, ás 19.30 horas no Pavillón de Los Pajaritos, ao Río Duero Soria. Os casteláns ocupan a segunda posición da Superliga e só perderon dous encontros como locais no que vai de campionato: contra Guaguas e Melilla Sport Capital. Os da Cachada, pola súa banda, continúan coa misión de sumar os primeiros puntos do curso.
Emilio Palacio, adestrador do Rotogal Boiro Voleibol, afirma que o Río Duero Soria “é un equipo moi competitivo e que mantén unha liña de regularidade”. “As nosas opcións para puntuar pasan por ter moitísimo acerto en ataque e sacar moi ben. O resto, a defensa e a recepción, estamos a facelo moi ben”, agrega. A única baixa dos da Cachada será Mario Iglesias, que non poderá participar por motivos laborais.
O Río Duero Soria está a callar unha campaña máis que notable que lle permitiu asentarse na zona alta da clasificación. O receptor Pelegrín Vargas e o oposto colombiano Juan Pablo Moreno, con pasado no Rotogal Boiro Voleibol, son dous dos xogadores máis destacados do conxunto castelán no que vai de tempada. Ademais, o receptor José Villalba foi incluído no septeto ideal da última xornada.
Precedentes
Tempada 2022-2023
Rotogal Boiro Voleibol, 0-Soria, 3
Tempada 2021-2022
Rotogal Boiro Voleibol, 3-Soria, 2
Soria, 3-Rotogal Boiro Voleibol, 2
Tempada 2020-2021
Soria, 1-Rotogal Boiro Voleibol, 3
Rotogal Boiro Voleibol, 3-Soria, 2
