Dende a área de Cultura do Concello de Outes compartiron o cartel e a información sobre o programa de festexos que acompañan este ano a celebración do Entroido, un programa que vén completo e que ten unha marcada vertente creativa.
A axenda comezará oficialmente o sábado 18 de febreiro, no Pavillón da Serra de Outes, cunha gran festa para a rapazada que incluirá inchábeis, photocall, obradoiros e animacións. Desenvolverase entre as 17.00 e as 21.00 horas.
Ao día seguinte, domingo 19, celebrarase o Baile de Entroido de Outes, no Centro Social da Serra, a partir das 18.00 horas. A vertente musical virá da man do artista Martín.
As festas do Entroido en Outes culminarán o mércores 22 de febreiro coa tradicional celebración do Enterro da Sardiña. O evento virá acompañado dun concurso de disfraces con premios para as mellores contribucións nas categorías de infantil, individual, grupos e comparsas.
Quen desexe participar neste concurso pode facelo a través do formulario habilitado na web municipal, www.outes.gal. Este formulario deberá enviarse debidamente cumprimentado ao enderezo animacion@outes.gal. O prazo estará aberto até o 20 de febreiro, ou, tamén, até o m esmo día do concurso antes das 16.30 horas no Polideportivo da Serra.
A cualificación do xurado será no propio Polideportivo ás 17.00 horas.
O desfile do Enterro da Sardiña sairá da praza de Galicia e percorrerá as principais rúas da Serra até até a praza do Bosque, onde se procederá a queimar a Sardiña e concederanse os diferentes premios aos mellores disfraces. Nota: en caso de chuvia suspenderase o desfile.
