O Concello de Outes presentou o programa de actividades cuadrimestrais do Centro Social de Outes e dos restantes centros de dinamización do termo municipal, unha axenda para os vindeiros catro meses (dende febreiro até maio) que vén cunha ampla variedade de opcións de lecer e formativas ao servizo de toda a veciñanza.
A programación, que pode estar suxeita a cambios segundo a formación e a capacidade dos grupos, desenvolverase en diversos escenarios do termo municipal: o Centro Social de Outes, o Colexio do Cruceiro de Roo, o Centro Sociocultural de San Cosme, o Centro Sociocultural de Cando, o Centro Sociocultural da Vila do Monte, o Centro Sociocultural de San Lourenzo e o Club Náutico do Freixo. Haberá obradoiros de ioga terapéutico, bailoterapia, patchwork, memoria, cestería, traballos en coiro, ximnasia terapéutica, gancho, vainicas e bordado, corte e confección e pilates.
