O martes 10 de xaneiro, o concelleiro de Educación, Deportes e Emprego de Dodro, Abel Tarrío Abuín, e o concelleiro de Cultura e Patrimonio, Xoán Xosé Vicente Franco, mantiveron unha xuntanza co secretario xeral para o Deporte da Xunta, José Ramón Lete Lasa, para estudar a posibilidade de co-financiar a reparación da cuberta do Polideportivo Municipal, que, segundo sinalaron os concelleiros, atópase en mal estado despois de máis de 25 anos de ter sido instalada. Os edís sinalaron que o orzamento da memoria valorada, feita en outubro do 2022 polo estudio técnico contratado polo concello para estes traballos, alcanza os 128.139,79 euros. A proposta presentada (que incluía un investimento do Concello de 55.379,17 euros por parte do Concello, a cargo da totalidade do POS+2023 da Deputación, un 43,2% do total, sendo o restante asumido pola Xunta), foi finalmente rexeitada.
Os concelleiros criticaron este feito e lembraron que “a porcentaxe que tería que ser asumida pola Secretaría Xeral nesta proposta vén sendo inferior á asumida pola Secretaría Xeral para o Deporte nos convenios asinados nos últimos anos por este departamento con varios concellos para investimentos deste tipo”. Porén, a Secretaría Xeral remitiu ao Concello a unhas subvencións de concorrencia competitiva que van sacar en datas vindeiras para este tipo específico de investimentos municipais.
“O Concello de Dodro”, explicaron os edís, “que coma calquera concello pequeno ten moitas dificultades para afrontar un investimento desta magnitude por si só, seguirá buscando unha solución a unha instalación fundamental no deportivo e no social ante a negativa da Xunta a colaborar”.
