O Concello de Boiro vai someter para a súa aprobación no pleno da Corporación deste xoves 26 de xaneiro os proxectos de mellora da infraestrutura viaria e iluminación pública do Parque Empresarial de Espiñeira. Faino con vistas a solicitar á Xunta as axudas relativas ao programa de creación e posta a punto dos polígonos galegos, unha liña de subvención habilitada pola Vicepresidencia Primeira e Consellería de Economía, Industria e Innovación.
Ao abeiro deste programa autonómico o Concello de Boiro encargou a elaboración de dous proxectos que levar a cabo para a mellora das infraestruturas do Polígono Industrial. “Trátase de dúas actuacións necesarias e moi demandadas polos empresarios, de feito nos últimos anos instaláronse no parque empresarial novas industrias cun alto volume de traballo e de afluencia polo que cómpre mellorar as infraestruturas e servizos do parque empresarial”, afirmou o alcalde, José Ramón Romero.
Un dos proxectos que se propón para a súa aprobación no pleno é o de mellora da rede viaria do complexo industrial de Espiñeira, que contempla a pavimentación de beirarrúas para mellorar a súa accesibilidade e que sexan máis seguras para as persoas usuarias do polígono que transitan por elas. O importe total do proxecto ascende aos 82.209,38 euros.
O outro dos proxectos que se presenta para o seu debate no pleno é o de mellora da iluminación pública, substituíndo as lámpadas actuais de vapor de sodio cun alto consumo enerxético por unhas de tipo LED, unificando a iluminación instalada en todo o polígono e logrando unha maior eficiencia enerxética, logrando un aforro do 82,13% respecto á situación actual. A actuación ten un importe total de 62.760,70 euros.
