Dende o Concello de Boiro anunciaban hoxe a replantación de árbores na mediana da Avenida da Constitución co obxectivo de mellorar as zonas que ficaron sen arborado. Máis polo miúdo, plantáronse un total de 43 árbores e 7 arbustos de máis dun metro de alto para cubrir todas as zonas despoboadas da mediana da avenida.
Deste xeito, os ditos traballos teñen como finalidade cubrir con especies vexetais aquelas zonas da mediana que nos últimos anos foron quedando sen árbores ao ter que cortar palmeiras e outras especies que se atopaban enfermas. “Son unhas actuacións que, ademais do impacto visual e
paisaxístico, contribúen á humanización dunha das principais vías do municipio e aportan sombra nos meses de máis calor”, subliñaba o alcalde de Boiro, José Ramón Romero.
