O Concello de Boiro informou do inicio das obras para a dotación de beirarrúas e servizos no lugar de Pedra da Bouza. As actuacións, dun importe de 182.014,13 euros, están financiadas mediante o Plan Único Concellos (POS+ 2022) da Deputación da Coruña. O alcalde, José Ramón Romero, e o concelleiro de Urbanismo e Obras, Luis Ruiz, visitaron na mañá deste 11 de novembro o lugar para coñecer o estado de execución dos traballos.
Segundo informaron, as tarefas a realizar cobren o tramo de estrada que une o núcleo da Pedra da Bouza coa DP-1106 en Abanqueiro. “Estas actuacións melloran a seguridade viaria dos peóns que diariamente transcorren por esa zona e tamén os servizos de recollida de pluviais”, afirmou o alcalde.
As obras pretenden xerar unha beirarrúas peonil de 1,8 metros de ancho e a instalación de condutos para a recollida de pluviais e canalizacións de auga, así como a creación de espazos de estacionamento.
“Estase a traballar na explanación da zona e a apertura de gabias (zanxas) para a instalación de conducións e a execución das beirarrúas”, explicou o concelleiro de Urbanismo e Obras.
A finalidade destas actuacións é dota de seguridade viaria aos peóns que circulan entre o núcleo da aldea da Pedra da Bouza e a estrada de Boiro a Abanqueiro. Trátase, engadiron, dun treito de estrada moi transitado por vehículos e peóns que conecta o núcleo do Saltiño con Abanqueiro.
