O BNG apoiou un día máis a undécima concentración veciñal en defensa da sanidade pública en Corrubedo na que se lle demanda ao Goberno galego “cubrir a praza do profesional médico a tempo completo que evite os desprazamentos a Ribeira e colapsar aínda máis ese Centro de Saúde”. Para os concelleiros Luís Pérez Barral e Cruz Rivadulla Márquez “o Partido Popular está de brazos cruzados mentres se agrava a situación de precariedade na sanidade pública, especialmente no rural”.
A concelleira do BNG Cruz Rivadulla relacionou este deterioro da sanidade pública galega cos “recortes orzamentarios que leva aplicando o Partido Popular durante 13 anos” e asegurou que “menos orzamento é menos Atención Primaria, chave para a prevención da saúde das galegas e galegos”. Segundo a edil nacionalista “non cubrir as prazas fai que medren as listas de espera, deteriórase a atención aos doentes e mesmo xa se notan as consecuencias no Hospital da Barbanza cunhas Urxencias colapsadas”.
Desde o BNG reclaman “a adopción de medidas empezando por un plan de choque de 200 millóns de euros, dotar os centros de saúde de novas especialidades, como psicoloxía clínica e un plan ambicioso e con investimentos para reducir as listas de espera ao tempo que lle recriminan ao Goberno galego a súa actitude de “negar o que está a ocorrer coa Sanidade”.
Por último os nacionalistas aseguran que “non van deixar de traballar a favor da sanidade pública tanto nas institucións como na rúa” e, neste sentido, anunciaron que apoiarán as mobilizacións que convoque a cidadanía en “calquera punto do país”, como a prevista para o próximo 12 de febreiro, “porque o BNG está sempre do lado da xente e preparado para liderar un cambio de rumbo”, concluíron.
