Na mañá deste 30 de xaneiro, luns, celebrouse o pleno da Mancomunidade de Municipios Barbanza Arousa na sala de xuntas do Consistorio de Boiro. No acto formalizouse o cambio de presidencia e o traspaso de poderes, que foi, precisamente, o punto da orde do día. Este proceso, informaron os membros da entidade, lévase a cabo de forma anual e, para o ano 2023 é a quenda de José Ramón Romero, alcalde de Boiro, que recolle a testemuña de Xosé Lois Piñeiro, alcalde da Pobra do Caramiñal.
Durante a sesión plenaria, ambos os alcaldes destacaron “a boa sintonía e a colaboración que existe entre os catro concellos da mancomunidade para levar a cabo a estratexia do destino turístico”.
En palabras de José Ramón Romero “continuaremos a estratexia que estamos levando a cabo nestes últimos anos de consolidación de produto turístico a través da potenciación da vertente enogastronómica, do turismo de festivais, por exemplo coa cita anual Paisaxes Sonoras, da consolidación do Camiño de Santiago e do turismo activo, coa homologación de catro roteiros de sendeirismo que poñen en valor a Serra do Barbanza”, dixo, poñendo o foco, tamén, “na aposta polos eventos deportivos”.
Este ano abórdase o inicio da execución do Plan de Sustentabilidade Turística dotado con 1,5 millóns de euros, o que “suporá un antes e un despois para o territorio”, engadiu.
En palabras dos alcaldes, a achega dos fondos Next Generation ao ecosistema turístico da comarca “significará a posta en valor da enogastronomía local e tamén da súa historia pesqueira, de salgadura, conserveira e vinícola que forxou unha identidade propia do destino”.
Destacan actuacións como a creación do Museo da Conserva, Museo da Salgadura, a inmersión no Barrio dos Cataláns así como experiencias no traballo nas adegas e conserveiras actuais e a degustación de produtos de primeira calidade que buscan xerar a emoción no visitante.
Continuarase, así mesmo, potenciando a colaboración público-privada e o traballo co sector, iniciándose este ano a implantación do selo de calidade turística SICTED.
