O Concello de Boiro colabora co club RS Bike na organización da “BTT 3 horas non stop Boiro” que terá lugar este domingo na contorna do Polígono Industrial de Espiñeira. Na presentación, que tivo lugar esta mañá, participaron a concelleira de Deportes, Dores Torrado, o presidente do club, Ramón García,
e o secretario do club, David Rodríguez.
A proba terá lugar este domingo entre as 10.00 e as 13.00 horas nun circuíto de 6 quilómetros e poden participar deportistas federados en modalidade individual ou por parellas, que poden ser masculinas, femininas ou mixtas. “A proba consiste en dar o maior número de voltas posible ao circuíto nas tres horas que dura a proba”, afirmou David Rodríguez.
A proba forma parte da Copa Galicia e dispútanse todas as categorías dende junior ata master 60. As inscricións están abertas ata as 23.59 horas deste mércores 25 de xaneiro e contase con chegar aos 300 inscritos. “É unha proba que transcorre por zonas que non entorpecen nin dificultan á veciñanza
ou tránsito”, afirmou o presidente do club.
O Concello de Boiro colabora coa seguiridade e organización da proba, aportando recursos e medios para que se desenvolva sen incidencias. “Esta proba serve para achegar o mundo da bici á poboación, así como poñer en valor o municipio e os espazos naturais dos que dispoñemos”, afirmou a concelleira de Deportes que animou á veciñanza a achegarse o domingo a ver esta proba.
