O Concello de Ribeira quere mellorar con varias importantes actuacións de seguridade e accesibilidade a contorna portuaria, o que se coñece como malecón ou fachada marítima. Trátase de dúas actuacións: por unha banda, a instalación de dúas novas marquesiñas noutros tantos puntos que carecen desta infraestrutura e, pola outra, a colocación dunha varanda separativa do recheo portuario entre Rosalía de Castro e a terminal de autobuses que se está terminando de edificar.
No tocante ás dúas marquesiñas, co “ánimo de facilitar o uso do transporte público”, en palabras do Concello, implantarase xunto á rotonda na que conflúe Romero Ortiz (no entorno do Centro de Saúde e a Residencia de Maiores e á altura da rúa Rosalía de Castro, polo lado de Portos).
As empresas interesadas deberán realizar unha proposta de deseño dos elementos a subministrar, debendo, segundo especifica o Concello, “gardar harmonía coas infraestruturas públicas da contorna” e cunha “estrutura que deberá ser realizada en aceiro galvanizado en quente e calado ou material con características superiores en canto á corrosión e menor necesidade de mantemento”. O prazo de execución son dous meses e o orzamento base de licitación ascende a 29.040 euros, IVE incluído. As empresas interesadas dispoñen ata o 18 de xaneiro á medianoite para presentar as súas ofertas a través do Sistema de Licitación Electrónica da Xunta de Galicia (SILEX).
Amais, como dixemos, vénse de licitar a instalación dunha varanda separativa entre o malecón e o recheo portuario no treito comprendido entre Rosalía de Castro e a nova terminal de autobuses. Estará feita de aceiro inoxidábel, estando formada por dúas seccións, unha de 200 metros de longo e 90 centímetros de altura e a outra de 52,5 metros de longo e 50 centímetros de altura. Neste caso o prezo base de licitación ascende a 64.674,50 euros, IVE incluído, e o prazo de execución do contrato son dous meses. As empresas poden presentar as súas ofertas a través do SILEX ata o 19 de xaneiro.
Accesibilidade
O Concello fai saber que “non serán estas as únicas actuacións que se van a efectuar no malecón nas últimas semanas”. Así, adxudicouse tamén outra obra de mellora da accesibilidade entre o paseo e a zona portuaria, neste caso no treito comprendido entre Rosalía de Castro e a rotonda na que conflúe Romero Ortiz.
A tal efecto vanse aplicar novos pavimentos de formigón e construír ramplas que permiten a accesibilidade, ademais dun muretes e bordos de granito. O prazo de execución son dous meses. A intervención foi adxudicada á empresa Tarrío & Suárez e supón un investimento de 48.099,76 euros, IVE incluído.
Carril bici
Por outra parte, o Concello explica que tamén se vai estender un novo pavimento anti-escorregante ao carril bici entre o malecón e o paseo das Carolinas, que cambiará de cor a verde para diferencialo mellor da zona de tránsito peonil afianzando a seguridade viaria.
