A Asociación Barbantia, referente cultural da nosa comarca, vai celebrar o vindeiro 27 de xaneiro a súa asemblea xeral ordinaria. Será ás 18.30 horas no Auditorio do Rianxo, comezando cunha primeira convocatoria e estando prevista o comezo da segunda para as 19.00 horas. A orde do día será a seguinte: lectura e aprobación da acta anterior, estado de contas para a súa aprobación, cambios na xunta directiva (eleccións), resumo da memoria anual de 2022, planificación do programa de 2023, informe de subvencións e a aprobación de socias e socios.
Os actos de Barbantia proseguirán na mesma xornada do 27, tamén no Auditorio rianxeiro, coa presentación da nova achega literaria do escritor barbanzán de adopción (aínda que natural da Limia) Antón Riveiro Coello, o libro de relatos Días da intemperie. Participarán, ademais do autor, Milagros Torrado, secretaria da A. C. Barbantia, Xesús Laíño, vogal da A. C. Barbantia, Marcos Calveiro, director de edicións de Galaxia e Adolfo Muíños, alcalde de Rianxo. A cita literaria contará cunha intervención plástica a cargo de Alfonso Costa. A vertente musical da apertura e do peche virá da man da Escola de Música de Rianxo. Este acto está enmarcado nos Actos Castelao 2023 que organiza o Concello de Rianxo e cuxo programa incluímos máis abaixo.
Ficha de Días da intemperie (ficha de Galaxia)
Os coidados, a fidelidade, a homosexualidade, a covardía, a vinganza, a suplantación de identidade,
O amor polos libros, o contrabando ou a orfandade son algúns dos temas que compoñen este libro estremecedor onde o pano de fondo sempre é a guerra.
Como xa fixera en As Rulas de Bakunin, Laura no deserto e O paraíso dos inocentes, Antón Riveiro Coello pon de novo os seus personaxes en situacións límite para que nos ofrezan o mellor e o peor de si. Relatos duros que nos enfrontan co espello para sabermos o lugar que poderiamos ocupar en conflitos tan diversos como os que acollen estes relatos. E tanto ten que a guerra se desenvolva en Ucraína, Siria, Rusia, Vietnam ou na raia seca ourensá. O importante nestas historias é o resultado conmovedor dunha escrita poderosa que, unha vez máis, ispe os personaxes para os deixar nunha intemperie que tamén podería ser a nosa.
