As contadoras, animadoras, narradoras e artistas musicais Rilo & Penadique están este martes 3 en Boiro co seu espectáculo Fartura de Nadal. Será ás 18.30 horas na Carpa Solidaria da praza de Galicia. Fartura de Nadal é un espectáculo de narración oral e música para público familiar que nos recorda a rica tradición cultural galega vencellada a estas datas sinaladas, contos, historias e cancións para sacar a relucir a carón do lume. Como os que contaban aquelas dúas velliñas que vivían xuntas, comían xuntas, durmían e soñaban xuntas… Ou aquela avoa que quería pasar o Nadal coas súas tres netas pero dálle por facer pan con mel… Rilo & Penadique tráennos un feixe de historias onde o quererse, xuntarse e divertirse, son, nas súas palabras, “o alimento do Nadal”.
