A compañía Amorodio Teatro vai realizar este xoves 19 de xaneiro a preestrea da súa segunda peza teatral, a A Nai. Será no Auditorio Municipal de Rianxo, onde as integrantes da agrupación levan instaladas dende o luns día 9 poñendo a punto a devandita función, dirixida por Marián Bañobre e escrita por Laura Porto. A preestrea será ás 20:00h.
A Naiconta a historia silenciada durante anos das Irmás Touza, veciñas de Ribadavia, vila onde está previsto estrear a peza o vindeiro 21 de xaneiro, xa que como di a compañía, “a historia naceu neste pobo e é neste pobo onde tiñamos que estrear”. A Nai, engaden, é “un espectáculo teatral multidisciplinar, que emprega ferramentas do teatro documento e da autoficción, sen perder nunca o sentido do humor”. O espectáculo aborda de cheo a historia das irmás Lola, Julia e Amparo Touza, salvadoras dunha cantidade estimada de 500 persoas xudías durante o Holocausto. Grazas á estimábel contribución humanitaria destas mulleres, a peza aborda a posibilidade de sermos mellores persoas en tempos de degradación moral. “Empregando a memoria como ferramenta de análise para o presente, e material de construción para o futuro, trázanse relacións entre a vida e obra das irmás e as vidas dos propios intérpretes, tratando de establecer un paradigma de acción ética que abra unha vía para construír unha sociedade mellor a través da acción individual”, explican dende a compañía.
Carmen Facorro, Javier Castiñeira e Raquel Velasco , son as intérpretes que, mesturando a súa vida coa das Touzas, intentarán contarnos esta historia de valentía e entrega polos demais enriba das táboas.
Amorodio Teatro agradeceu ao Concello de Rianxo as facilidades brindadas para a materialización do espectáculo a través desta residencia técnica. Tamén agradeceu a axuda de todos os concellos e institucións que colaboraron no proceso para que A Nai fose posíbel, tales como a Xunta de Galicia, AGADIC, o Concello de Ribadavia, o Concello de Caldas de Reis, o Concello de Santiago de Compostela e a confitería Sila.
A dita peza conta na vertente escenográfica co binomio formado por Asdúasepunto (Carmen Casal e María Torres) e na parte lumínica con Violeta Martínez. Pola súa banda, Raquel Crespo é a encargada de vestiario e a produtora Enibó, composta por Adolfo Fernández e Lucas Lombardo, é a responsábel da realización dos audiovisuais. Os grafismos correrán a cargo de Xoán Brégoa.
