O Concello de Ribeira confirmaba hoxe a adxudicación das obras para a creación na zona de Fontán, preto do paseo do Touro, do novo espazo deportivo urbano municipal. A dita obra será realizada pola empresa Obras y Viales de Galicia, S.L., supoñendo un investimento de 142.420 euros (IVE incluído).
A nova infraestrutura, de 432 metros cadrados de superficie, emprazarase sobre unha parcela municipal de 480 metros cadrados situada en Fontán, a 200 metros do paseo do Touro e na contorna da nova Comisaría e do novo Punto de Encontro Familiar.
O proxecto foi redactado por Daniel Yábar, prestixioso arquitecto alacantino especializado neste tipo de instalacións, responsábel de actuacións como o Skatepark de Santa Lucía en Vitoria, a Skateplaza de Logroño, o Skatepark Parque de la Granja en Tenerife ou o Bowl Vía Hispanidad de Zaragoza.
O Concello explicou que o proxecto inclúe a construción dun skatepark in situ a base de formigón gunitado cunha zona de rúa e outra de rampla que estará integrada na paisaxe. O futuro espazo de deportes e cultura urbana será un espazo inclusivo e disporá de diversos elementos como unha pirámide, unha duna, un hip, unminiramp ou un corner.
Completarán a intervención a colocación de papeleiras, bancos, aparcabicis e instalación das columnas e proxectores.
O orzamento base de licitación é de 150.409,50 euros e o prazo de execución de tres meses.
