A mesa de contratación do Concello de Ribeira adxudicou provisionalmente as obras para a instalación dunha varanda separativa entre o paseo do Malecón e a zona portuaria. Entre as seis ofertas presentadas a que obtivo a mellor puntuación resultou ser a presentada por Juan José Pacheco Revuelta (Talleres Birlongo), cunha proposta económica de 50.578 euros, IVE incluído.
Esta iniciativa está dirixida a colocar un equipamento de seguridade que marque a división entre o Malecón e a zona portuaria, no treito comprendido entre Rosalía de Castro e a nova parada central de autobuses. A estrutura estará feita de aceiro inoxidábel e formada por dúas seccións, unha de 200 metros de longo e 90 centímetros de altura e a outra de 52,5 metros de longo e 50 centímetros de altura.
O Concello tamén informou do inicio (unha vez concluídos os traballos de demolición ao antigo pavimento afectado) do formigonado do tramo do Malecón comprendido entre Rosalía de Castro e a antiga estación de autobuses no marco dunha actuación que ten por obxecto mellorar a accesibilidade entre esta avenida e o recheo portuario.
Os traballos están sendo desenvolvidos pola empresa Tarrío & Suárez. O proxecto comprende a construción de ramplas de acceso, muretes e bordos de granito.
Outras actuacións previstas na mesma zona son a instalación de dúas novas marquesiñas singulares (hai tres ofertas presentadas na licitación) e o cambio de pavimento no carril bici.
