A Xunta concedeu unha axuda de 62.000 euros ao Concello de Outes para a creación dunha escola infantil municipal de 30 prazas. A conselleira de Política Social e Xuventude, a ribeirense Fabiola García, visitou este mércores 11 de xaneiro o lugar das vindeiras instalacións, situadas no edificio do antigo CEIP Emilio de Navasqües. Fíxoo acompañada do alcalde Manuel González, e doutros membros da Corporación local. Segundo informou, a atención educativa que se dispense dende o inmóbel será de balde para as familias “grazas ao financiamento do Goberno galego a todos os centros da Comunidade”.
A conselleira concretou que esta actuación suporá ampliar en 10 prazas o actual Punto de Atención á Infancia (PAI) de Outes que se converte así nunha escola infantil. Esta axuda procede da orde para a creación de prazas de titularidade municipal que beneficia a unha vintena de concellos e permitirá crear máis de 450 novas prazas de atención 0-3 anos.
Fabiola García sinalou que Galicia “tense convertido nunha referencia a nivel nacional na conciliación das familias gracias a medidas como a gratuidade de todas as escolas infantís; a creación de 95 casas niño para levar a conciliación a concellos onde non existían estes servizos; e tamén mediante o Bono Coidado, que ofrece axudas para a contratación dun apoio extraordinario de conciliación”.
