O Concello de Boiro vai celebrar este sábado 28 de xaneiro un obradoiro de ximnasia hipopresiva. Será ás 11.00 horas no Centro Social, no segundo andar. A persoa encargada de impartir o taller é Verónica Couselo, integrante de Pilates Boiro. Trátase dunha actividade abeirada ao programa municipal de divulgación cultural, saudábel e deportiva para mulleres, Miscelánea en Movemento. As inscricións haberá que facelas mediante o Rexistro municipal ou na sede electrónica do Concello.
Para quen non o saiba, a ximnasia hipopresiva comprende exercicios cuxo obxectivo é xerar hipopresión dentro da cavidade abdominal. Esta técnica consiste en realizar distintos tipos de movementos e posturas por medio dunha contracción do músculo diafragma en expiración. Un dos seus grandes beneficios é que a través destas técnicas conséguese mellorar o aparato xenitourinario da muller ou solucionar problemas de costas, alén dos efectos positivos que ten a nivel estético nos abdominais e máis no ventre en xeral das persoas que a practican.
