O Concello da Pobra do Caramiñal comezou o ano achegando conciliación para facilitar a vida laboral das nais e dos pais e achegar actividades de lecer para o tempo libre das crianzas. Farao polas tardes a través do Espazo de Coidados Corresponsábeis, servizo municipal de balde ao abeiro do Plan Corresponsábeis promovido e financiado con fondos procedentes do Ministerio da Igualdade.
A Concellaría da Igualdade, da cal é titular a edil Charo Varela (Nós Pobra), explica que o obxectivo é “contribuír a compatibilizar a vida laboral e persoal de mulleres e homes”, ademais de “fomentar a correponsabilidade nos labores domésticos e na atención á familia favorecendo a asunción equilibrada das responsabilidades”.
O dito proxecto funciona de luns a venres, en horario de 16.00 a 21.00 horas, no CEP Salustiano Rey Eiras. A rapazada de entre 3 e 12 anos asistirá a obradoiros de lectura, labores manuais ou xogos cooperativos, entre outras propostas, todas elas con perspectiva de xénero.
Ofértase un total de 20 prazas que se deberán reservar no Departamento da Igualdade do Concello. Máis información no enderezo electrónico igualdade@apobra.gal ou no teléfono de contacto 981832764, marcando a extensión 6.
A maiores, lembrar que o Concello facilita polas mañás o Servizo de Madruga e Comedor.
