Logo do peche da infraestrutura durante as recentes festas parroquiais, o Concello de Porto do Son confirmou a dispoñibilidade para alumnado e veciñanza (de Nebra e do termo municipal en xeral, aínda que fóra do horario lectivo) da pista polideportiva do Colexio de Nebra. Trátase dun proxecto orzamentado en 85.000 euros cuxa construción abeirouse ao Plan de Nova Arquitectura Pedagóxica deseñado pola Xunta para os centros educativos, cuxo obxectivo é “achegar infraestruturas máis sustentábeis, innovadoras, accesíbeis e útiles”.
A pista ten unha superficie de 22 por 12 metros cadrados e estará pechada por un valado dun metro de alto, levantada (pista e área perimetral) sobre unha soleira de 15 centímetros. O sistema de drenaxe é lineal de formigón polímero, conducíndose as augas á rede de pluviais habilitada. A iluminación, sustentábel e eficiente, vai permitir a alumnos e veciños o desfrute da pista en calquera intre do día.. Conta con porterías e canastras de gran resistencia e levantadas sobre postes de aceiro. Tamén dispón do equipamento preciso para a práctica de deportes como o tenis, o voleibol ou o bádminton. Dos 85.000 euros de orzamento, 40.960 foron asumidos pola Xunta e o resto polo Concello.
