A Casa da Cultura de Boiro acolle este venres día 27 de xaneiro entre as 20.00 e as 22.00 horas unha charla informativa sobre o TDAH (Trastorno por Déficit de Atención e Hiperactividade) organizada pola ANPA Torre de Goiáns. Na presentación, que tivo lugar na mañá deste mércores 25, participaron a concelleira de Educación, María Outeiral, e as representantes da ANPA Olga Moledo e Patricia Davila.
“É moi importante dar a coñecer o TDAH, esteamos ou non relacionados directamente con este trastorno, xa que moitas veces queremos axudar pero non temos a información de como facelo adecuadamente”, recoñeceu a concelleira. É por iso que o Concello de Boiro, a través do departamento de Educación, colabora coa comunidade educativa para levar a cabo xornadas formativas e informativas dirixidas á poboación xeral.
“Detectamos que hai moito descoñecemento sobre como actuar ante necesidades especiais, por iso decidimos organizar este tipo de xornadas informativas e divulgativas”, afirmou Olga Moledo.
A ANPA celebrou xa unha primeira charla sobre o autismo, que, segundo sinalaron as representantes da comunidade de nais e pais, ” tivo moi boa aceptación”, e esta segunda xornada está destinada a dar a coñecer e responder todas as dúbidas xurdidas arredor do TDAH.
O vindeiro venres terá lugar unha charla sobre o TDAH impartida polas psicólogas xerais sanitarias Claudia Balado e Sara Martín que traballan axudando ás familias con necesidades especiais. “É unha charla aberta a todo o mundo, tanto persoas vinculadas directamente co TDAH como aquelas que non o están, para dar a coñecer como podemos actuar e axudar a estas persoas a levar unha vida mellor”, recoñeceu Patricia Davila.
