A concelleira María Sampedro presentou este 14 de decembro a axenda municipal de actividades para o Nadal en Ribeira, un extenso e diverso programa de programas que arrinca este venres 16 co Festival de Nadal de Amas de Casa que será benéfico a favor de Cáritas Parroquial de Ribeira. O programa terá continuidade ao día seguinte, sábado 17, co Festival de Nadal de Bailadela. “Será unha axenda para animar as rúas, núcleos e parroquias de Ribeira”, sinalou a edil de Cultura.
Segundo engadiu, o programa Nadal Cultural desenvolverase sobre todo en horario de tarde “con propostas e accións para todos os públicos”, con especial aposta por aquelas actividades de carácter infantil-familiar e tamén con accións e festivais impulsados “polo noso tecido social e entidades culturais”, como as devanditas propostas do 16 e o 17.
Tamén o sábado 17 está previsto un contacontos especial para bebés de 0 a 3 anos no Centro Cultural Lustres Rivas con dous pases, un ás 11.45h e outros ás 12.30h, e o domingo 18 na Aula de Música de Aguiño celebrarase o festival da Asociación Musical Sons do Mar e cunha actuación do grupo A Misela na Igrexa de Bretal.
Sampedro recalcou que a gran protagonista será, con todo, a poboación infantil, cunha programación gratuíta no Auditorio Municipal ás sete da tarde, dende o luns 26 de decembro ata o 4 de xaneiro diferentes espectáculos, comezando por Axudante de Papá Noel, proxeccións de cine como o filme Donkey Xote, actuacións de maxia co Mago Paco, propostas de monicreques como Un nadal cheo de contos e Sabela e o paxaro máxico da compañía Tarabelos, así como espectáculos musicais a cargo de Musicreques ou de Gallaecia Eventos coa función Cantando con Pinocho. Para pechar as propostas no Auditorio tamén se contará o 7 de xaneiro co Festival de Tahume.
Nesta edición volverase a abrir de novo as portas do Espazo Municipal de Usos Múltiples con diferentes actividades baixo o nome Nreda no Nadal. Alí os días 23, 24, 29, 30 e 31 de decembro, e 4 e 7 de xaneiro haberá de xeito gratuíto inchábeis, obradoiros de globoflexia, mascotas animadas, animación musical e tamén uvas de gominola o 31 para para festexar o fin de ano infantil, e unha Festa de Reis o día 7. Neste mesmo recanto estará habilitado o Espazo Concilia no que as familias poderán deixar aos nenos e nenas mentres realizan as súas compras de Nadal.
Así mesmo, volverá funcionar o Recuncho de Nadal na praza de Porta do Sol. A casiña de madeira abrirá as súas portas ao Apalpador, a Papá Noel e ao Carteiro Real dende o 23 de decembro para que os máis pequenos poidan achegarse a visitar a estas personaxes e deixarlles as súas cartas e desexos. Ademais recibirán rifas de balde para o sorteo dos tres agasallos que como é habitual sortean os Reis Magos o día da Cabalgata dende o balcón do Concello.
Os días máis destacados, como son o sábado 24 de decembro e o sábado 31, o Nadal tamén sairá á rúa. Haberá parques de inchábeis na rúa Galicia, o tren expresso de Oriente percorrendo a cidade, así como ruadas musicais coa charanga Fanfarria Furruxa.
Ademais, o sábado 24 está programada unha sesión vermú do grupo local Rockolas, o venres 30 ás nove e media co grupo Blow, e o 7 de xaneiro outra sesión vermú do grupo SabelasNotas.
Nesta edición darase un protagonismo especial ás actuacións musicais e, ademais das rúas musicais, preparouse un programa de concertos de Nadal e animacións de rúa que estarán espallados por todas as parroquias do municipio e que contarán ao remate con chocolatada de balde para os asistentes ata esgotar existencias. Comezarán as actuacións o domingo 18 na igrexa de Bretal coa Misela de Noia, o mércores 21 en Carreira estará a charanga Os Celtas da Baña, e continuará o xoves 22 en Castiñeiras, o venres 23 en Ribeira co concerto da nosa coral municipal na igrexa parroquial, o domingo 25 de decembro celebrarase o Nadal en Corrubedo cun concerto dos Liantes, o mércores 28 chegará a música a Palmeira, o xoves 29 a Oleiros, o venres 30 en Aguiño na igrexa parroquial e rematarase en Artes o domingo 8 de xaneiro coa Rondalla Moraima.
Tamén haberá programación infantil en todas as parroquias co programa Nadal Pelegrín que estará viaxando por todas elas polas tardes dende o 26 de decembro, que arrancará en Palmeira, ata o 4 de xaneiro que rematará en Aguiño. O Nadal Pelegrín achegará inchábeis, unha visita do Carteiro Real, obradoiros infantís e un espectáculo sorpresa ademais de música e baile. Os nenos e nenas que acudan ás actividades recibirán unha rifa para participar no sorteo dos agasallos que realizarán os Reis Magos o día da Cabalgata dende os balcóns do Concello.
Ademais, en todas as parroquias a veciñanza volverá contar cos puntos municipais de recollida de soños coas caixas de correo de Nadal.
A axenda tamén contará co II Festival de Inverno con actuacións de rap e DJ e coa festa de Noitevella prevista para a última noite do ano na zona de Bandourrío coa música do DJ Chupas e Mateo Abelleira.
Durante o Nadal continuarase co programa expositivo na Sala do Centro Cultural Lustres Rivas e o venres 23 de decembro está prevista a inauguración da exposición Solpor na ría de María José González Area ás sete da tarde.
A programación tamén incluirá o 5 de xaneiro a visita do Bus Real ás parroquias coas súas maxestades e a celebración da Cabalgata de Reis, da que o Concello dará máis información nos vindeiros días.
